Pilason ang 35 anyos nga Barangay Public Safety Officer matapos nga ginlabo sa So. Nabataan, Brgy Rizal,ciudad sang San Carlos, sang Enero 16, alas 2:25 sang hapon.
Ang biktima ang ginkilala nga si Eduardo Prajes, 35 anyos, kasado, nagatrabaho bilang Barangay Tanod, samtang ang suspetsado naman ang ginkilala nga si Mike Caballero, 24 anyos, lunsay mga residente sang nasambit nga lugar.
Sa interview sang Bombo Radyo kay Police Major Ryan Villasario, Deputy Chief of Police sang San Carlos City Police Station, nangayo sang bulig ang iloy sang suspetsado sa barangay bangod sa komosyon nga nagluntad sa tunga sang suspetsado kag sang iloy sini.
Suno kay Villasario, nagresponde ang barangay tanod sa area, kag gin-esturya pa sini ang suspek apang hinali lang nga naggabot sang binangon ang suspetsado kag ginlabo sa liog ang barangay tanod.
Gindala sa San Carlos City Hospital ang biktima agud mahatagan sang nagakaigo nga pagbulong samtang ang suspetsado naman nalagyo sa wala nahibaluan nga direksyon.
Apang, suno kay Villasario, ang suspetsado ang yara lamang nagapanago sa area kag sa karun padayon ang pagpangita sang kapulisan agud nga maaresto ini.
