Ginluthang sa atubang mismo sang iya asawa ang isa ka Barangay tanod sang suspetsado nga ginapatihan nga miyembro sang New Peoples Army sa Barangay Laaga-an, banwa sang Calatrava, kahapon, kapin alas- 5:30 sang aga.
Ang biktima ang ginkilala nga si Alexander Alquizar, 54 anyos, kasado, nagatrabaho bilang barangay tanod kag residente sang nasambit nga barangay.
Sa imbestigasyon sang Calatrava Municipality Police Station, nagapanguma ang biktima kaupod ang asawa sini sa ila nga duta sang hinali lang nga nag-abot ang suspetsado kag ginluthang ang biktima.
Gilayon naman nga nalagyo ang suspetsado sa wala nahibaluan nga dereksyon samtang gindala pa sa opital ang biktima apang ini ang gindeklarar nga dead on arrival.
Sa karun, ginalantaw nga miyembro sang NPA ang suspetsado bangod nga nagabaton sang death threat ang biktima gikan sa rebelde nga grupo.
