Patay ang isa ka barangay tanod kag anay miyembro sang Civilian Home Defense Forces (CHDF) matapos nga gintiro kag ginbuno sa Purok 3, Barangay Camalanda-an banwa sang Cauayan nagligad nga Huwebes.
Sa interview sang Bombo Radyo Bacolod kay P/Major Lowell Garinganao, hepe sang Cauayan Municipal Police Station, ginpahayag sini nga samtang nagalawig sang karbaw si Julie Casumpong, 60-anyos sa unhan sang ila puluy-an, hinali nalang ini ginbanggaan sang tatlo tubtob lima ka mga wala pa makilal-an nga mga suspetsado kag gintiro gamit ang ginapatihan M16 rifle kag M14 rifle kag ginbuno pa sa nagkalain-lain nga bahin sang lawas sini nga gintunaan sang iya gilayon nga kamatayon.
Suno kay Garinganao nakaangkon sang duha ka igo sang bala ang biktima kag apat ka mga pilas tuga sang pagpamuno.
Ginalantaw karon nga motibo sa pagpatay sa biktima amo ang anay trabaho sini bilang miyembro sang CHDF kag ang pagka-tanod sang barangay.
Ginalantaw naman sang kapulisan nga posible mga miyembro sang New People’s Army (NPA) ang nagpatay kay Casumpong.
Napaidalom naman sa post mortem examination ang bangkay sang biktima kag sa karon padayon pa ang imbestigasyon angot sa insidente.
