Nakuhaan na sang statement ang 15-anyos nga barkada sang 14-anyos nga dalagita nga kalakip sa tatlo ka mag-ulutod nga ginlampusan sang bato sa Hacienda Badiang, E lopez, Silay City.
Sa karun padayon nga nagapa-ayo ang 14 anyos nga babayi kag 4 anyos nga lalaki sa Corazon Locsin Montelibano Memorial Regional Hospital (CLMMRH) samtang ang 9 anyos naman nga si Desiree Bornales ang natalana nga ilubong sa Domingo sa Silay City Public Cemetery.
Sa interview sang Bombo Radyo Bacolod kay Negros Occidental Police Provincial Office Spokesperson Police Captain Judesses Catalogo nga amo man ang spokesperson sang Special Investigation Task Group Bornales, nakuha na ang pahayag sang barkada sang dalagita kag sang mga residente sa lugar.
Suno diri, sa bahin sang iloy nga si Ronelyn Montaneiz Ansiano, nagapati ini nga wala sang kahilabtanan ang mga barkada sang bata niya sa natabo.
Pahayag ni Catalogo, padayon ang imbestigasyon sang SITG Bornales kun sa diin may yara na sang ginakonsiderar nga Persons of Interest.
Nagdangat na sa P100,000 ang padya nga ihatag sa makatudlo sa suspek nga naglampos sang bato sa tatlo ka bata kag nagbunggo sang ila ulo sa pader.
