Ginreport sang Philippine Coast Guard (PCG) kahapon nga may nagluntad nga “close distance maneuvering” incident nga gin-imbulbaran sang Chinese Coast Guard (CCG) vessel sa West Philippine Sea sang Marso 2, samtang sila ang nagapatigayon sang maritime patrol operation.
Ang CCG vessel 3305 ang nahibaluan nga nagahulag sa 21 yards padulong sa BRP Malabrigo MRRV 4402 sa baybayon sang Bajo de Masinloc ukon Panatag Shoal sang magluntad ang insidente.
Ang manuevering space sang BRP Malabrigo ang ginbalabagan sang CCG vessel, nga ginakabig bayolasyon sa 1972 International Regulations for Preventing Collisions at Sea.
Santo sa PCG Commandant Coast Guard Admiral Artemio Abu, ini na ang ikaapat nga nareport nga close distance maneuvering incident kun sa diin imbulbado ang mga CCG vessel sa vicinity sang Bajo de Masinloc.
Suno kay Abu, ang ginpakita nga ugali sang partikular nga CCG vessel ang nagapasaka pa sang risgo sang collision sa apat pa nila nga mga capital ships.
Gani gilayon sila nga nagkoordinar sa National Task Force for the Philippine Sea (NTF-WPS) kag Department of Foreign Affairs (DFA) nga I-address ang nasambit nga isyu pinaagi sa rules-based kag peaceaful approache.
Sang Mayo 19, 2021, ang BFAR vessel MCS-3005 nga ginamaneho sang PCG ang nareport nga una nga insidente sang close distance maneuvering kun sa diin imbulbado ang CCG vessel 3301.
Sa ikaduha kag ikatatlo nga insidente, imbulbado naman ang CCG vessels nga 3301 kag 3103 nga nagapatigayon sang close distance maneuvering sa BRP Capones MRRV-4404 kag BRP Sindangan MRRV-4407 kadungan sa maritime capability enhancement exercises sang PCG sa vicinity sang Bajo de Masinloc sang Hunyo 1 kag 2, 2021.
Suno kay Abu, nakahibalo ang mga ini sa delikado nga sitwasyon sa dagat, apang ini ang indi makapugong sa ila nga deployment sang assets kag personnel sa Bajo de Masinloc, Philippine Rise kag iban pa nga bahin sang exclusive economic zones (EEZ) sang Pilipinas.
