Ginpahayag sang kampo ni Vice President Sara Duterte nga ang ila sabat sa apat ka articles of impeachment ang nakabase sa freedom of expression, confidentiality sang bank records, kag Anti-Money Laundering Council (AMLC) reports, kag sa kakulangan sang supisyente nga ebidensya batok sa iya.
Sa ila paathag, isa-isa nila nga ginsabat ang tagsa ka akusasyon kag ginpanindugan nga wala ini nakalab-ot sa legal standards para sa impeachment.
Sa ila nga dokumento, ginpangabay sang bahin ni Duterte nga ibasura ang impeachment complaint.
Samtang, sa isyu may kaangtanan sa gina-alegar assassination plot batok kay President Ferdinand Marcos Jr., First lady Liza Araneta-Marcos, kag anay House Speaker Martin Romualdez, ginsabat sang depensa nga ang mga nangin pahayag sang bise presidente ang kabahin sang constitutionally protected speech kasubong man sang iya nga pagpamatok sa mga polisa kag mga tikang sang administrasyon.
Ginpanginwala man sang depensa ang alegasyon sang paggamit sang masobra P600 million nga confidential funds sang OVP kag DepEd, kag ginkwestyon nila ang kredibilidad sang testigo nga si Ramil Madriaga.
Suno sa ila, legal ang pagpagwa sang pondo.
Sa bahin naman sang unexplained wealth, ginpahayag sang depensa nga indi dapat paggamiton bilang ebidensya ang mga testimoniya kag AMLC records bangud sa confidentiality kag legalidad sang pagkuha sini.
