Ginpahayag sang menor de edad nga gin-alegar nga biktma sang pagpanghimulos nga wala sang kahilabtanan sa natabo sa iya ang 20 anyos nga si Nicus Balagusa nga napatay matapos nga ginluthang.
Ang insidente nagluntad kapin alas- 7:00 sang gab-i sang Hunyo 2, sa Granada Heights Subdivision sa Barangay Granada, Bacolod City.
Sa interview sang Bombo Radyo Bacolod kay Police Captain Portia Nillosan, station commander sang Bacolod Police Station 5, ginaproseso na sa karun sang ginikanan ni Balagusa ang pagpasaka sang kaso kay Carlito “Dondon” Tongho, nga amay sang 16 anyos nga dalagita nga gin-alegar biktima sang pagpanghimulos.
Si Tongho ang positibo nga ginkilala sang ginikanan ni Balagusa sang siya mismo ang nagsulod sa ila kwarto kag nagtiro sa bata nila.
Suno kay Nillosan, sa hot pursuit operation kay Tongho, ginkakibot sang bata sini nga gintiro sang iya amay si Balagusa nga wala man ini sang kahilabtanan sa pagpanghimulos sa iya.
Santo sa inisyal nga imbestigasyon, wala nalakip sa blotter report sa pagpanghimulos si Balagusa, apang ang yara didto amo ang 17 anyos kag 19 anyos nga abyan sini.
Kag nakita sa CCTV footage nga sang Mayo 31, ang adlaw nga natabo ang krimen, nakapauli na si Balagusa sa ila nga balay.
Sa karun, wala sa gihapon nadakpan si Tongho kasubong man nga indi na makit-an sa area ang 17 anyos kag 19 anyos nga gina-alegar amo ang mga suspek nga naghimulos sa 16 anyos nga bata ni Tongho.
