Ginahulat na lamang sa karun ang resulta sang CT Scan sang bata nga nagabaligya sang kakanin nga nabungguan sa dalan Lacson, Barangay Mandalagan, Bacolod City kapin alas-2:00 sang Sabado sang hapon.
Sa interview sang Bombo Radyo Bacolod kay Police Staff Sgt. Richard Dema-ala, traffic investigator sa Bacolod Police Station 3, maayo-ayo na sa karun ang kondisyon sang bata.
Madumduman nga matapos mabungguan sang Toyota Fortuner ang bata sa pedestrian lane, wala ini nagdulog bangod sa kakulba.
Suno kay Dema-ala, ang suspetsado nga yara sa 30s ang edad ang driver sa isa ka private company kag sakay man sini ang iya amo sang natabo ang aksidente.
Apang gilayon naman ini nga nagsungka sa Bacolod Police Station 2, apang siya ang ginrefer sa Bacolod Police Station 3 kun sa diin ini nakakita sang paagi agud makapakig-angot sa amay sang bata.
Suno kay Dema-ala may inisyal na nga kwarta nga gindaho ang driver para sa balayran sa ospital kag nagsugtanay naman ang mga ini nga magacontact na lamang ang pamilya kun may dugang pa nga galastuhan.
Mismo ang amay sang bata man ang nagpahayag sa Bacolod Police Station 3 nga indi na lamang ihunong ang driver bangod ini ang nagbulig naman sa pagpabulong sa bata.
Suno kay Dema-ala wala sang injuries ang bata apang ini ang ginpaidalum sa CT Scan agud maseguro nga siya ang wala sang damage sa ulo ilabi na nga siya ang may pilas matapos mabunggo sa semento.
