Plano sang bata ni Gloria Romero nga magfile sang complaint angot sa nagalapta nga peke nga last will and testament sang veteran actress.
Madumduman nga nagtaliwan ang movie icon kag Queen of Philippine Cinema sa edad nga 91 sang Enero 25, sa karun nga tuig.
Suno sa pamilya, wala sang kamatuoran, wala sang basehan kag wala sang ebidensya ang nagalapta nga last will and testament amo nga indi dapat nga magpadala-dala diri ang publiko.
Ginatun-an na sang pamilya ang legal nga tikang nga mahimo agud mauntat ang nagapadayon nga paglapta sang fake news kag para mapasabat sa layi ang mga nagapalapta sini.
Makit-an sa peke nga last will and testament ang dako nga balor sang kwarta nga nakadeposit sa bangko, ang balor sang mansyon ni Gloria, ang presyo sang bubluthuan nga luyag sini nga ipatindog sa Pangasinan, ang balor sang donasyon sini para sa tatlo ka institusyon nga wala na ginpangalanan pa kag ang balor sang panublion nga ihatag sang aktres sa iya bata nga si Maritess Guitierrez kag apo nga si Chris Gutierrez.
Ginalauman ang pagfile sang complaint ni Maritess sa masunod nga inadlaw.
