Ginbawian sang kabuhi ang bata, samtang pilason naman ang amay kadungan sa Paskwa, matapos ginluthang sang pulis sa Barangay Canjusa, Pulupandan, Negros Occidental alas-4:00 kahapon sang kaagahon, Disyembre 25.
Ang biktima amo sanday Joman Fuentes, 21 anyos, single, construction worker kag amay sini nga si Jomarie Fuentes, 52 anyos, kasado, construction worker samtang ang suspect amo si Police Corporal Armin Alanza, 36 anyos, residente sa lugar apang assigned sa 604th Company sang Regional Mobile Force Battalion 6.
Sa interview sang Bombo Radyo Bacolod kay Police Major Edfiel Balibadlan, hepe sang Pulupandan Municipal Police Station, naga-inom sang beer sa tyangge ang pulis kag suno sa tag-iya sang tyangge ini ang naka-anom na ka botelya antes natabo ang insidente.
Nagbakal man sang beer sa tyangge si Joman apang siya ang ginsita ni Alanza.
Pagpauli, ginsugid sang bata sa pamilya ang natabo kag ila nga ginbalikan ang pulis nga nasundan na sang komosyon.
Suno kay Balibadlan, nasumbagan ang pulis rasun nga siya ang naghunos sang cal. 9mm pistol kag ginluthang ang mag-amay.
Ang bata ang nakaangkon sang pilas sa nawala nga dughan nga gintunaan sang iya kamatayon samtang ang amay ang may pilas naman sa kilid.
Matapos sang pagpaniro, si Alanza ang ginpulihan kastigo sang kapin lima ka bystander kag nakaangkon sang pilas sa ulo gani siya ang gindala man sa Valladolid District Hospital.
