Nalakip ang bata sang alkalde sang Calatrava sa alleged drug personalities nga nadakpan sang mga pulis nga nagagamit sang illegal nga druga kadungan sang buybust operation nga ginpatigayon sa Luzuriaga Street, Barangay 6, San Carlos City, Negros Occidental kagab-i.
Suno kay Police Lt. Roby Aurita, deputy chied sang San Carlos City Police Station, ang subject sang operasyon amo si Chito Atienza nga may previous man nga kaso angot sa illegal nga druga sang tuig 2019 apang nahilway.
Suno kay Aurita, street level individual sa illegal drugs ang classification ni Atienza.
Sang ini ang nakagwa sa prisuhan, ginpadayon sang mga pulis ang pagmonitor sa iya kag naggwa nga ini ang naglie low sa buluhaton apang nagbalik naman sa illegal drug trade.
Kagab-i, nagmadinalag-on ang operasyon batok kay Atienza.
Yara naman sa balay ni Atienza agud nga maggamit sang shabu sanday Nestor Era Jr. nga bata ni Mayor Marilyn Era sang banwa sang Calatrava kag Rosalia Nemenzo.
Suno kay Aurita, nakibot ang mga operatiba nga yara si Era sa balay ni Atienza agud nga maggamit sang illegal nga druga bangud wala ini sa drugs watchlist.
Santo sa impormasyon, drug user gid man si Era sa banwa sang Calatrava.
Nakabaton naman sang impormasyon ang San Carlos City Police Station nga nagagamit sang illegal drugs si Nemenzo naman nga labandera ni Atienza kag naabtan ini sa balay sang subject nga naggamit man sang shabu.
Bangud nakuhaan sang shabu sa ila nga possession, sila ang gindakop sang mga pulis.
Sa karon, indi pa matumod kun drug den ang balay ni Atienza bangud santo sa monitoring, nagabaligya lang ini sang shabu apang nagapahanugot man sa iya mga abyan nga magsuyop sa iya nga kwarto.
