Ginpahayag sang bata sang biktima sang gina-alegar drug war killings nga matawhay pa ang sitwasyon ni former President Rodrigo Duterte sa International Criminal Court, wala sa kamalingking sa kasakit nga ila nabatyagan sang madulaan sang palangga sa kabuhi.
Sa interview sang Bombo Radyo Bacolod kay Lean Redino Poquia, isa sa mga nagfile sang disbarment case batok kay Duterte, long overdue na ang arrest warrant.
Suno diri, sang ginpatay ang iya amay sang 2020, nagtukod sang special panel sa pag-imbestigar sa Extra Judicial Killings.
Suno diri, halin 2019 tubtob 2021 ang pagfile sang crime against humanity cases sa ICC, kag subong lamang nga 2025 napagwa ang warrant of arrest.
Ginakalipay ni Poquia nga naaresto nagid man ang anay Presidente.
Suno diri, ginhatag kay Duterte ang due process sa pagserbe sang warrant of arrest.
Ini ang ginbasahan sang miranda rights, gin-eksplikar kun ano ang kaso nga nakapagkit sa warrant of arrest kag pag-abot sa The Hague, Netherlands, ini ang gilayon man nga ginhatagan sang medical attention.
Pahayag sini nga VIP treatment si Duterte nga ginsakay sa private jet, kag bisan sa detention cell, ini ang naka-aircon, may TV kag hilway nga makatawag sa iya pamilya.
Suno kay Poquia nga kaangay nga tuman ka makaluluoy si Duterte kun magpakita sa tawo, apang ang gina-agyan sini ang wala sa kamalingking sa kasakit nga iya nabatyagan sang ginpatay ang iya amay.
Sa pihak nga bahin, indi man suno diri mapatuman ang panindugan sang kampo ni Duterte nga dapat maglabay anay sa local court sa Pilipinas si Duterte, bangod ang crime against humanity ang ginatalakay lamang sang ICC kag wala ginahatag sa mga local court.
Matapos ang pre-trial presentation kun sa diin ginpatpat man ang pangatubangon sini nga 43 counts sang crimes against humanity, si Duterte ang sarang makapetisyon para sa temporary release samtang wala pa ang next trial nga nakaschedule sa Setyembre 23.
Apang nagapati si Poquia, nga may proseso ang ICC nga indi dapat flight risk ang akusado, kag sa ginapakita sang mga supporters ni Duterte ginalantaw sini nga indi pagsugtan sang ICC ang petition for temporary release.
Panugyan sini kay Duterte nga magpabilin na lamang sa Netherlands bangod matawhay man ang kabuhi sini sa ICC Detention Facility.
