Ginalantaw sang bata sang e-bike driver nga gintiro sang iya kaingod sa Purok Saturn, Barangay Handumanan, Bacolod City nga naling-an ang suspetsado sa inaway sang iya mga ginikanan.
Sa interview sang Bombo Radyo Bacolod kay Ryan Abibas, ginkadtuan sang iya amay nga si Rene ang balay sang suspetsado nga ginkilala sini nga si Reymark Mardukyo kag ginapagwa niya ini.
Suno kay Ryan, nagwa man ang suspetsado kag gintiro ang biktima gamit ang sulpak kag ini ang naigo sa kilid.
Ginhangagaw naman dala sa ospital ang biktima apang ginbawian sang kabuhi.
Suno sa bata, sang Sabado sang gab-i, nagainum ang iya iloy kag amay sini upod ang ila tagsa ka mga abyan.
Naghigda sang makadali ang iya iloy agud nga magpahuway apang ginhampak ini sang iya amay rason sang ila pag-inaway.
Nag-intra ang suspek kag ginsinggitan ang mag-asawa nga perwisyo ang ila nga opisyo.
Kasunod nga adlaw ginsulong sang biktima ang suspek kag iya nga gintiro.
Sa karun padayon nga ginapangita sang mga kapulisan ang suspetsado.
Padayon pa nga ginapangita sang Bacolod Police Station 10 ang suspect nga nagtiro kay Rene Abibas.
Sa interview sang Bombo Radyo Bacolod kay Police Captain Lelanie Lagoting, station commander sang Bacolod Police Station 10, natumod naman sang mga ini ang suspetsado nga nagtiro sa biktima.
Suno kay Lagoting, pagkatapos nga nahimo sang suspek ang krimen nagpalagyo ini padulong sa sapa.
May narekober nga part sang sulpak sa crime scene.
Padayon pa nga ginaimbestigaran sang mga kapulisan ang motibo sa krimen.
Suno kay Lagoting, bag-o lang nakagwa sa prisuhan ang suspetsado matapos nga mapriso bangud sa paglapas sa RA 9165 ukon Comprehensive Dangerous Drugs Act of 2002.
Panawagan sini sa suspetsado nga magsungka na kag atubangon ang konsekwensya sang iya nga ginhimo.
