Patay ang bata sang electrician sang Barangay Bata, ciudad sang Bacolod matapos gintiro sa Purok Pine Tree sa nasambit nga barangay kaina sang aga.
Ang biktima ang ginkilala kay Yuki Castro sang Purok Marapara, Barangay Bata.
Suno sa mga residente sa lugar, ang biktima ang nagpadulong sa iya kahagugma nga nagapuyo sa Purok Pine Tree kag may mga barkada man ini diri.
Suno sa witness nga nagpakilala kay Marites, nagbakal sang sigarilyo si Castro sa iya nga tiange kag may kaupod ini nga babayi kag lalaki.
Suno kay Marites, nagakumod si Castro sa chubby nga kaupod kag sang nagpanaog ini sa gutter, hinali lang nga naglupok.
Wala naman nakita nanday Marites kun ano ang ginasakyan sang mga suspetsado.
Naglakat naman ang kaupod ni Castro nga isa ka babayi antes ini gintiro.
Isa lang ka lupok ang nabatian nanday Marites kag nakit-an na lamang ang biktima nga may pilas sa natuo nga bahin sang dughan kag nagabaruro sa dalan kag wala na sang kabuhi.
Ginreport naman nga nagaangkasanay sa motorsiklo ang mga suspetsado apang wala na ini nakita ni Marites.
Suno sa manghod ni Yuki, pito sila nga mag-utod kag ikatatlo ang biktima.
Wala naman sini ginhimutig nga medyo pasaway ang iya magulang.
