Ginpahayag sang bata sang gintiro-patay nga family driver sa St Vincent, Barangay Alijis, Bacolod City kahapon sang hapon, September 1, nga sang kaagahon pa lang may yara na sang nakakita nga nagalalisay ang iya amay kag ang suspek.
Sa interview sang Bombo Radyo Bacolod kay Alyas Banoy, may nakahambal na sa iya nga basi may matabo nga gamo kag wala gid ini magsala.
Ala-1:00 kahapon sang hapon, bag-o pa lang nakabugtaw ang iya amay kag maniaga kuntani, apang sang nakita ini sang suspek sa gwaan, ini ang hinali na lamang nga ginluthang sang suspect.
Ang suspetsado ang nakaplastar na ngadaan kag ginahulat lang ang pagwa sang biktima.
Ginpahayag man sang bata sang biktima nga antes ang insidente nakapost pa sa social media ang suspek sang armas-luthang.
Suno kay Banoy, nagtinguha pa ang amay sini nga magdalagan apang nakadasma ini kag gintiro liwat sang suspek matapos magbuya sang indi maayo nga mga tinaga.
Suno sa bata ang iya amay ang nakaangkon sang pilas sa ulo kag sa iban pa nga bahin sang lawas.
Pahayag sini nga kilala nila ang suspek nga si alyas Budoy nga nagatinir man sang una sa Bacolod Public Plaza kag gina-alegar nga isa man ka kawatan.
Suno sa bata ang iya amay kag iya iloy ang madugay naman nga bulagay.
Suno diri ang biktima ang mabuot kag halos nagasabay sa tanan.
Mensahe sini sa suspetsado nga “sa ulihi ang paghinulsol” kag wala gid sini ginpanumdom ang iya pamilya antes naghimo sang krimen.
