Ginpanindugan sang bata sang anay convict sa drug charges nga ginplantedan lang sang ebidensya ang iya amay sang nagsulod ang mga pulis sa ila nga balay sa Barangay Alicante, EB Magalona sang Huwebes kun sa diin liwat ini nga ginpriso bangud sa possession sang suspected shabu.
Si Allan Divino ang gindakop sang mga miyembro sang EB Magalona Municipal Police Station sa ila mismo nga balay sa presensya sang iya mga kabataan nga kalabanan menor de edad.
Biyernes nga adlaw, nagpadulong sa Bombo Radyo ang anak ni Allan nga si Alicia Divino agud ireklamo ang ginakabig niya nga iregular nga operasyon sang mga kapulisan.
Suno kay Alicia, nagalibod ini sang sundol sang iya nahibaluan nga gin-operate sang mga pulis ang iya nga amay.
Sa iya nga pagpauli, ginpunggan ini sang mga pulis nga magkuha sang iya nga cellphone agud nga magvideo kag ginhambalan nga sarang ini makasuhan sang obstruction of justice.
Suno kay Alicia, gindakop sang mga pulis ang iya amay apang wala nila nahibaluan ang imbentaryo sang suspected shabu nga nakuha sa possession sini.
Panindugan ni Alicia, nakit-an sang iya mga manghod nga wala sang nakuha ang mga pulis sang ginrikisa ang iya amay apang gindala ini sa likod sang ila balay kag pagbalik sa sulod, may ginplastar na nga drug recoveries.
Sang naistorya ni Alicia ang iya amay sa detention cell sang EB Magalona, ginpahayag ni Allan nga ginplantedan lang ini sang ebidensya.
Bangud sini, naghingyo sang bulig si Alicia nga makakuha sila sang abugado para sa kaso sang iya amay.
Nagpanawagan man ini sa EB Magalona Police Station nga kaayuhon ang ila nga trabaho.
Si Allan ang napriso sang anom ka tuig sa Negros Occidental District Jail bangud sa drug charges kag sang Hulyo lang nakagwa sa prisuhan.
Sa pihak nga bahin, nagpanindugan naman ang hepe sa EB Magalona Municipal Police Station nga wala sang irigularidad sa ila operasyon.
![](https://img.bomboradyo.com/bacolod/2022/01/EB-MAGALONA-2.jpg)
Pahayag ni P/Capt Eric Doronilla nga antes paman sang operasyon nakabatun na ang mga ini sang report nga nagbalik sa iligal nga buluhaton si Divino.
Nagbutang man ang mga ini sang babayi nga pulis nga amo ang ginpasecure sa mga minor de edad sa lugar kag ginpalayo bangod ini maayo nga makita sang mga ini ang hitabo.
Paathag ni Doronilla nga may deretso ang bata nga babayi sang suspetsado sa alegasyon sini nga ginplantedan sang droga ang iya amay, apang ginapasalig sini nga nagakaigo ang ila nga pagperform sang trabaho.
Panugyan naman sini nga kun may reklamo mahimo lang nga magpadulong sa EB Magalona Municipal Police Station ukon magpangayo sang bulig sa iban nga mga ahensya nga mahimo mapalapitan.
Dugang pa ni Doronilla nga bisan sa video nga ginahuptan sang bata, wala man sang makita nga bayolente nga aktwasyon nga ginbuhat sang kapulisan kag yara man sa lugar ang media kag mga katapo sang Barangay.
Pahayag sang hepe nga nahangpan man nila ang bata nga mahimo nadala sang emosyon.
Paatyag sini nga wala ang nagareklamo nga bata sang ginpatigayon ang buybust operation kag ulihi na ini nga naka-abot.
Pasalig sini nga wala sila sang ginkwa nga pagkabutang kag ang mga ini ang ginsecure lang.
Dugang pa ni Doronilla nga pagalantawon man sang mga ini kun may nakumiter nga bayolasyon sa Republic Act 7610 ukon Special Protection of Children Against Abuse, Exploitation and Discrimination Act ang suspetsado bangod sa pagpatigayon sang iligal nga transaksyon sa atubang sang mga kabataan.
Igatugyan naman sang mga ini sa Department of Social Welfare and Development (DSWD) ang pagtan-aw kun mahimo bala nga makapasaka sang dugang nga kaso.
Pasalig naman ni Doronilla sa mga pumuluyo sang EB Magalona nga wala nagapahuway ang mga kapulisan sa kampanya batok sa iligal nga droga kag nagapadayun man ang ila drug clearing operations sa mga barangay.
Hingyo naman sini sa mga nahatagan na sang ikaduha nga kahigayunan kaangay kay Divino nga magbag-o na sang kabuhi, buligan ang kaugalingon kag buligan ang ila nga banwa.