Indi man makapati ang isa ka bata sang 62 anyos nga suspetsado sa paglugos kag pagpatay sa 17 anyos nga dalagita sa Purok Masinolondon, Barangay Magsaysay, Cadiz City nga mahimo sang iya amay ang krimen sa ginakabig na sini nga apo.
Sa interview sang Bombo Radyo Bacolod sa tiya sang biktima, nga naghingyo nga itago na lamang ang pangalan, nga sang nagtaliwan ang ila iloy sang 2022, didto na kag amat-amat nga nagbag-o ang pagtratar sang ila amay nga si Federico Delfin, 62 anyos sa biktima.
Suno diri, sa tanan nga apo, lain gid ang pagpalangga sini sa dalagita.
Ginaprangka man sini ang iya amay kun naluyag sa biktima bangod sa ginasugat gid sini kun diin man magkadto ang dalagita, apang masami sini nga sabat nga palangga niya ang iya apo gani iya ini nga ginahalungan bangod lamharon pa lamang.
Apang sa ila nga apat ka mag-ulutod, ang iya amay kag si Peter Delfin, nga stepfather sang biktima ang masami man nga naga-away.
Antes ang pagkadula sang dalagita, nagmaoy pa si Peter kag sang nakatulog na ini, nabatian sini ang pagpahayag sang iya amay nga “tulog ka subong, kay pila ka adlaw indi kana makatulog”.
Samtang sang namissing ang biktima kag ginapangita na sang mga Barangay Tanod, ang suspetsado ang sa ila balay nagtulog apang alas-4:00 sang aga kahapon, ini ang nagpauli agud magkwa sang mga gamit.
Ginpilit siya sini nga idul-ong, bangod luyag sini nga makapalayo kay Peter bangod gina-alegar sini nga siya ang ginadumtan kag ginapasingitan bangod sa pagkadula sang biktima.
Ginarasun naman sini nga nakita sini ang dalagita nga nagsakay sa blue nga tricycle nga suno diri mahimo nag upod sa iya nobyo.
Ini ang ginkatingala man sang tiya bangod ginalantaw sini nga kun nagtanan ang biktima indi sini ibilin ang iya cellphone kag relo.
Apang wala na sini ginpadalman pa kag ginpadul-ong nalang sa iya bana ang tigulang.
Apang sang nakita ang bangkay sang bata, ginpinsar na sini nga nagpadulong sa iya manghod sa ciudad sang Kabankalan ang iya amay, gani iya man ini gincontact.
Gilayon man sini ginpahibalo sa Cadiz City Police Station kun sa diin ang iya amay, apang gintago sini sa senior citizen nga siya ang suspetsado kag pagadakpon na sang kapulisan.
Bangod na abtan pa sang isa ka adlaw, antes narecover ang amay, dako man ang kakulba sang ila manghod bangod kaangay nga lainlain na ang ginapanghambal sang amay kag sila ang nagakahangawa nga sila ang patyon man sini.
Halos indi ang mga ini makapati nga nahimo sang amay ang pagpanghimulos kag brutal nga pagpatay sa makabig na sini nga apo.
