Subong nga Lunes, mabaskog nga pagmadlos sang hangin ang mabatyagan sa Batanas kag Northeastern Babuyan Islands karun nga padayun ang paghulag sang Typhoon Julian sa Balintang Channel.
Ang sentro sang mata sang bagyo ang ulihi nga nasiplatan sa kadagatan sang Balintang Island, sa Calayan, Cagayan.
Ini ang nagadala sang huyop sang hangin nga nagadangat sa 155 km/h kag pagmadlos nga tubtob 190 km/h, samtang ini ang nagahulag sa nakatungdan nga dereksyon sa kadasigon nga diyes kilometros kada oras.
Ginpaidalom sa Tropical Cyclone Wind Signal no. 4 ang Batanes kag naaminhan nga bahin sang Babuyan Islands.
Signal no. 3 naman sa nabilin nga bahin sang Babuyan Islands kag northeastern portion sang mainland Cagayan.
Signal no. 2 sa nabilin nga bahin sang mainland Cagayan, Apayao kag Ilocos Norte.
Samtang Signal no. 1 naman sa Ilocos Sur, La Union, Pangasinan, Abra, Kalinga, Ifugao, Mountain Province, Benguet, Isabela, Nueva Vizcaya, Quirino, Aurora, naaminhan kag nasidlangan nga bahin sang Nueva Ecija, kasubong man sa Polillo Islands.
Lauman ang makusog nga ulan kag mabaskog nga ulan sa nasambitan nga mga lugar, kag padayun man ang paandam sa posibilidad sang pagluntad sang mga baha kag landslides.
Ginalauman nga mas magapalapit pa sa Balintang Island kag Batanes ang Bagyo Julian subong nga aga tubtob sa hapon, kag mataas man ang tyansa nga ini ang magalandfall.
Sumugod bwas, ang bagyo ang ginalantaw nga magakurbada pasaka padulong sa southwestern coast sang Taiwan, kag ginalantaw nga magalandfall sa Miyerkules sang aga ukon sa hapon.
Ginalantaw nga padayun pa nga magakusog ang bagyo kag mahimo magdangat sa Super Typhoon category sumugod bwas.
