Opisyal na nga nagbukas kaina alas- 4:00 sang hapon ang Batang Pinoy kag Philippine National Games nga patigayunon sa Manila.
Ang delegado sang ciudad sang Bacolod ang ginabug-usan sang 131 ka mga atleta nga magahampang sa Batang Pinoy kag 42 nga magahampang sa Philippine National Games.
Ang nasambit nga aktibidad ang patigayunon sa subong nga adlaw tubtub sa Disyembre 22 sa Rizal Memorial Complex, Manila.
Ang mga atleta ang magapasakop sa nagkalain-lain nga sports disciplines kaangay sang arnis, athletics, archery, basketball, badminton, beach volleyball, chess, cycling, karatedo, swimming, table tennis, lawn tennis, taekwondo kag weightlifting.
Sa interview sang Bombo Radyo kay Geraldine Montemayor Secretary sang Bacolod City Youth And Sports Development, nangin mabudlay para sa ila sang sila nag-abot sa Manila ang buluthuan nga ila kun tani nga billeting area ang wala pa nakahanda bangod nagapatigayon pa ini sang Christmas party amo nga naghulat sang pila ka oras ang mga atleta antes pa sila nakapahuway sang husto.
Kabudlayan man para sa ila ang nagkalain-lain nga mga venues ang patigayunan sang hinampang, amo nga isa sa ila nakita nga problema amo ang transportasyon.
Sa karun, naka-settle na ang mga atleta kun sa diin iban sa ila ang nag-umpisa na sang ila nga mga matches.
Pahayag ni Montemayor, posible nga indi man halos tanan nga team sang Bacolod City ang makakuha sang medalya apang sigurado ini nga may yara gid sang medalya nga mahatag ang team para sa ciudad.
