Ginpangunahan ni President Ferdinand Marcos Jr. ang Bawat Bayan Makikinabang (BBM) program sa Negros Oriental, kahapon, Agosto 17.
Ang programa ang may katuyuan nga mapalapit ang bulig sang gobyerno sa mga komunidad kag mapabakod ang seguridad sa pagkaon, edukasyon, kag paghatag sang serbisyo sa mga pamilya nga nagakinahanglan.
Gin-emphasize sang president ang importansya sang gilayon nga pagsabat sa mga kinahanglanon sang mga Negrense.
Sa Barangay Talay, Dumaguete City, 2,230 ka benepisyaryo ang nakabaton kada isa sang napulo ka kilo nga bugas paagi sa LGSF-Bagong Pilipinas Rice Program.
Sa bug-os nga Negros Oriental, 386,673 ka benepisyaryo ang target nga makabenepisyo sa nasambit nga programa.
Ginpangunahan man sang presidente ang ceremonial turnover sang P20,000 nga financial assistance para sa 15 ka Bagong Pilipinas Presidential Scholars, nga nagarepresentar sa 250 ka scholars halin sa Dumaguete City, Valencia, kag Bacong.
Sa bug-os nga Negros Oriental, 2,785 ka scholars halin sa 557 ka barangay ang ginapaabot nga makabenepisyo sa SCPF-Bawat Barangay Makikinabang Program.
Ginpasalig liwat ni President Ferdinand Marcos Jr ang padayon nga suporta sa mga Negrense, ilabi na sa mga pamilya nga nagakinahanglan kag sa mga kabataan nga nagapaninguha sa ila pag-eskwela, agod malab-ot ang mayo nga pagpangabuhi, mas maayo nga mga oportunidad, kag mas maayo nga palaabuton.
