Nakabase na sa kadamuon sang nakolekta nga basura ang bayad sa private garbage hauler sa ciudad sang Bacolod subong nga tuig.
Suno kay Ma. Fe Tresfuentes, officer-in-charge sang Department of Public Services, nagsugod sang Mayo 1 ang bag-o nga kontrata sang IPM Construction and Development Corporation sa hauling sang basura kag management sang sanitary landfill kag ini ang magadugay sang walo ka bulan tubtub sa Disyembre.
Suno diri, igabase na sa volume sang basura nga nakolekta sang IPM ang bayad sa ila kada bulan.
Ang IPM ang bayaran sang P1, 275 kada tonelada sang basura samtang P7.9 million kada bulan naman para sa management sang landfill.
Nahibaluan nga isa idalom sang daan nga kontrata, fixed ang bayad sa IPM kun dako ukon gamay ang volume sang basura nga ila makolekta.
Aminado ini nga indi 100 porsyento ang efficiency sang basura sa ciudad sang Bacolod apang ila nagpatuman sang garbage zonal collection schedule sa idalom sang bag-o nga kontrata.
Suno diri, makaduha ka beses makakolekta ang garbage hauler sa mga barangay kag subdivision samtang kada adlaw naman ang koleksyon kun yara sa highway kag mga establisyimento.
Gin-activate naman nila ang hotline para sa reklamo sang mga pumuluyo.
Ginapaabot ni Tresfuentes nga mapatuman ang better collection system basta sundon lang sang garbage hauler kun ano ang naistoryahan.
Nagapadayon naman ang biowaste collection nagikan sa mga merkado apang depende naman ini sa mga partners sang ciudad nga magabaton sini.
