Nagalaom si Bayan Muna chairperson Atty. Neri Colmenares nga mapasaka na sa Senado para sa trial ang ginfile nila nga impeachment complaint batok kay Vice President Sara Duterte sa Enero ukon Pebrero sa masunod nga tuig.
Sa interview sang Bombo Radyo Bacolod, ginsumiter sang mga ini ang complaint alas-3:30 kahapon sang hapon kag “betrayal of public trust” ang nagserbe nila nga grounds.
Ang complaint ang dapat masumiter sa plenaryo sa sulod sang tatlo ka adlaw kag sila ang may 10 ka adlaw sa pagdesisyon.
Paathag ni Colmenares nga kun makuha ang one-third votes ukon 106 ka boto gikan sa mga kongresista, ang impeachment complaint ang ipasaka na sa Senado para sa trial.
Samtang sa tion nga indi makuha ang kinahanglan nga boto, ini ang irefer sa Justice Committee kag magapatigayon sang hearing.
Ipatawag diri ang bise presidente kag pahanugutan nga makasabat ukon magsumiter sang counter affidavit.
Diri na desisyonan sang kongreso kun idismiss ukon ipasaka sa Senado ang impeachment complaint.
Nagalaom ini nga mapadasig ang proseso bangod sa kasunod nga mga binulan, ang mga kongresista ang magafocus naman sa nagahilapit nga 2025 Midterm Elections.
Sa pihak sini, mas maayo suno kay Colmenares kun madugangan ang magfile sang complaint bangod ini ang iconsolidate sa discretion sang House members bangod isa lamang ang ipasaka nga articles of impeachment.
Samtang 11 ka mga kongresista man ang magaprosecute sa Senado gani sila man ang magapili kun diin nga grounds ang mas masarangan nga ipakigbato.
