Ginpahayag ni Bayan Muna chairperson Atty. Neri Colmenares nga kun may yara na sang mapapreso si President Ferdinand ‘Bongbong’ Marcos jr nga mga dalagko nga personalidad, amo pa lang kag makahambal ini nga makapalakpak ini para sa presidente.
Sa interview sang Bombo Radyo Bacolod kay Colmenares, may yara sang ginpromisa na naman si Marcos kag may yara man sang wala man nasambit sa iya ika-apat nga State of the Nation Address.
Interview with Muna chairperson Atty. Neri Colmenares
Suno diri, may apat ka butang ini nga nasambit, isa diri ang angot sa korapsyon sa flood control projects kag mga taytay.
Apang suno dirm, madugay naman ini nga problema kag dako na nga kwarta ang nakawat apang sa karun pa lang ini nahibaluan sang presidente.
Naghambal pa si Marcos nga kasohan sini ang madakpan nga may kaangtanan sa korapsyon kag suno kay Colmenares, ipakita sang presidente nga makasohan ang sa likod sini bisan pa nga kaalyado, kontra sa pulitika ukon dalagko nga personalidad.
Ginkatingala man sini ngaa subong pa lamang nakahibalo si Marcos nga madamo sang traders kag cartel nga nagamanipular sa presyo sang bugas.
Sa bahin naman sang edukasyon, suno diri indi laptop ang problema apang mga classrooms, teachers, kag mga gamit sang estudyante ang mas importante.
Nabatian man ni Colmenares ang promisa ni Marcos sa problema sa tubig, apang sa liwat suno diri madugay na ini apang subong lang ginpadaluman.
Para sa chairperson sang Bayan Muna, kun i-rate sini ang presidente, failure ini para sa iya bangod madamo sang problema nga madugay na apang subong lang nahibaluan sang presidente.
