Dismayado si BAYAN MUNA Executive Vice President Atty Carlos Isagani Zarate sa tikang sang prosekusyon nga pagwithdraw sa tatlo ka Articles of Impeachment batok kay Vice President Sara Duterte.
Sa interview sang Bombo Radyo Bacolod kay Zarate, sa pagwithdraw sa reklamo sa grave threat kag misuse sang confidential funds, kaangay man nga gin-acquit na si VP Sara ukon ini ang ginkonsiderar na nga wala nakasala.
Indi ini kumpormi sa pagsakripisyo sang prosekusyon sa panawagan sang pumuluyo sa full accountability para sa ila tactical advantage.
Suno diri, indi na makilal-an kun sin-o si Mary Grace Piattos, samtang luyag man mahibaluan sang publiko kun ano ang salabtun sang opisyal nga maisog nga nagahimo sang pagpamahog sa atubang sang publiko.
Bangod gin-atras na ang mga akusasyon kag acquitted na si VP Sara sa kaangay nga mga reklamo, indi naman mahibaluan kun ano ang tindog ukon desisyon sang mga Senator-judges natuhoy sa issue.
Apang aminado man si Zarate nga ini ang estratehiya sang prosekusyon bangod nakita nila nga magadaog na sila paagi lamang sa unexplained wealth nga topiko.
Suno diri, sala man sang depensa kun ngaa nahatagan sang kahigayunan ang prosekusyon nga iwithdraw ang ila mga reklamo, bangod sa pagduso nga tapuson sang prosekusyon ang presentasyon sang apat ka articles antes sila magsabat.
Nahibaluan nga sa regular nga schedule, dapat kuntani nga matapos presentar sang prosekusyon sa isa ka article, sunod naman nga magapresentar ang depensa sang ila counter evidence.
Para kay Zarate wala sang mistrial sa pagwithdraw sang prosekusyon sang mga impeachment article bangod ini ang ginapahanugutan bisan sa mga regular courts.
Sa pihak sini ginalantaw man sang abogado nga mahimo indi lamang 14 ang Senator-judges nga magaboto pabor sa conviction, kag mahimo nga ini ang makalab-ot pa sa 16 votes.
Paathag niya nga ang impeachment ang indi kaangay sa criminal proceedings, nga kinahanglan sang proof without reasonable doubt, kundi nakadepende lamang sa pag-apresyar sang mga Senator-judges sa presentasyon sang ebidensya.
