Para kay Bayan Muna Executive Vice President Atty Carlos Isagani Zarate, ginagamit ni Vice President Sara Duterte ang “victim-effect” sa pagfile sini sang bail sa 3 counts sang grave threats complaint batok sa iya.
Sa interview sang Bombo Radyo Bacolod kay Zarate, ang pahayag ni VP Sara nga siya ang nahadlok bangod ginasurveilance sang kapulisan kag ginamonitor ang ila hulag, sa tinutuyo nga maakig ang iya mga supporters kag magtingob agud siya ang ipakigbato.
Para sa abogado, ang sitwasyon ni VP Sara ang bisan paano makapabatyag sa iya sang ginabatyag nga kahadlok sadto sang iban nga Pilipino nga sila ang mahimo ma-tokhang ano man nga oras sa idalom sang administrasyon ni former President Rodrigo Duterte.
Ginakatingala man sini kun paano nakabatyag si VP Sara nga siya ang indi safe kun ini ang may ginatos nga security forces.
Para kay Zarate, ang tikang ang paglikaw lamang sa matuod nga issue.
Pahanumdom pa sini nga nagpagwa na sang pahayag ang Philippine National Police nga sila ang wala sang namonitor nga threat sa Bise Presidente.
Dugang pa sini nga ang purpose sang masobra 300 nga security personnel ang agud maseguro nga safe si VP Sara kag madula ang security threat.
Para kay Zarate, luyag lamang ni VP Sara nga ipakita nga siya ang ginadaog-daog, nga para sa iya malayo sa kamatuoran.
Panindugan sini nga hilway nga makahulag si VP Sara, kag ini ang nagabyahe pa sa abroad, kag wala man sang natabo nga malain sa iya.
Pahayag ni Zarate nga wala man sang makuha ang Marcos Administration kun may himuon nga malain sa Bise Presidente.
Sa pagdagdag sang warrant of arrest, apisar nga nagfile sang bail, si VP Sara ang required nga magpangayo sang travel authority gikan sa Quezon City Regional Trial Court kun siya ang magabyahe sa abroad.
Samtang pagalantawon man sang korte kun may-ara sang flight risk, ukon posibilidad sang pagpalagyo.
Nagapati si Zarate nga wala sang plano nga magpalagyo si VP Sara bangod siya ang sitting Vice President, kag may political ambition pa sa 2028 Elections. Sa pihak nga bahin… Ginalantaw sang Bayan Muna ang posibilidad nga mahimo nga isuspend anay ang criminal proceedings sa kaso nga grave threat nga ginfile batok kay Vice President Sara Duterte.
Sa interview sang Bombo Radyo Bacolod kay Bayan Muna Executive Vice President Atty Carlos Isagani Zarate, bisan para sa Presidente, wala nakapagkit sa 1987 Constritution tuhoy sa immunity from suit.
Apang bangod ini ang yara sa nauna nga konstitusyon, ginkonsiderar na lamang sang Korte Suprema nga ini ang ipadayun.
Ini sa tinutuyo nga indi madistract sa mga mahimo ipasaka nga kaso ang Presidente sa ila nga mga desisyon para sa pungsod.
Samtang ini ang kwestyonable pa sa iban nga impeacheable officials.
Ini bangod may mga nagapahayag nga wala nalakip ang iban nga impeacheable officials sa immunity.
Suno diri, sa impeachment rules, ang mga impeacheable officials ang makakas lamang sa ila pwesto paagi sa impeachment.
Sa pihak nga bahin, may-ara naman nga ruling ang Korte Suprema sadto sa disbarming case batok kay former Deputy Ombudsman for the Visayas Arturo Mojica nga wala nagtugot sa pagpasaka sang kaso nga may ara sang accessory penalty nga magasuspender sa ila nga makaserbisyo, bangod ini ang magasupak naman sa impeachment rules.
Apisar nga indi malakip sa impeacheable official ang Deputy Ombudsman, ang ruling ang aplikable sa Ombudsman nga isa ka impeacheable official, kaangay sang Bise Presidente.
Sa pihak sini, wala ginpahanugutan sang Korte Suprema ang disbarment case sadto, bangod indi na makafunction si Mojica bilang Deputy Ombudsman kun siya ang indi abogado.
Nagapati si Zarate nga amo man ang panindugan sang kampo ni Duterte, nga malapas ang impeachment rules nga ini ang indi mapahalin sa pwesto luwas sa impeachment trial sang pagfile sang criminal case nga grave threat.
Ini bangod may accessory penalty man sa kaso nga magasuspender sa Bise Presidente sa iya pwesto, samtang nagapadayun ang trial proceedings.
Gani ginalantaw ni Zarate nga mahimo nga ipahigad anay ang criminal charges.
