Ginpahayag ni former Bayan Muna Representative Atty Carlos Zarate nga handa magbulig ang partido kun may-ara sang magafile sang kaso batok kanday former President Rodrigo Duterte, Senators’ Ronald “Bato” Dela Rosa kag Christopher Lawrence “Bong” Go kag iban pa nga opisyal nga imbulbado sa drug war killings sang Duterte Administration.
Ini kasunod sang rekomendasyon sang House Quad Committee sa pagfile sang Republic Act 9851 ukon Philippine Act on Crimes Against International Humanitarian Law, Genocide, and Other Crimes Against Humanity.
Sa interview sang Bombo Radyo Bacolod kay Zarate, ang una nga purpose sang House QuadCom Hearing ang “in aid of legislation” ukon agud makabulig sa paghimo ukon pag-amyenda sang layi.
Ang ikaduha amo ang “oversight function” kun sa diin kun sila ang may makita nga bayolasyon sa layi, sila ang makarekomendar nga ini ang pasakaan sang kaso.
Kalakip sa mga ginarekomendar nga pasakaan sang kaso ang nahanungod sa linibo nga biktima sang drug war killings, kag mga alleged drug lords nga ginpamatay sa Davao penal colony.
Suno diri, ini ang dapat nga imbestigaran sang Department of Justice kag National Bureau of Investigation kag kaupod sa mga dokumento kag testamento nga ebidensya nga natipon sang House of Representatives, ini ang ifile sa korte.
Pahayag ni Zarate nga kun linibo ang mga ginpatay nga wala man napamatud-an nga may sala apang wala ginhatagan sang due process, sanday Duterte kag mga kaupod sini ang gamitan sang due process agud mahatagan sang hustisya ang mga biktima.
Ara man sa provision sang RA 9851 nga ginarespeto ang ano man nga iban nga imbestigasyon nga mahimo patigayunon sang iban nga entities kalakip na ang International Criminal Court.
Paathag ni Zarate nga bisan natapos na ang Duterte Administration kag wala na sa ICC, ang nagpadayun nga kaso sang extrajudicial killings ang mahimo man nga ipadayun sa local court.
Ginakatingala lamang sini kun ngaa nagapahayag si Duterte nga poliutically motivated ang rekomendasyon sang House Quad Committee kun ini man mismo ang una nga nanghangkat nga siya ang kasuhan.
