Hulaton pa sang Bayan Muna partylist ang mangin dalagan sang pagtalakay sang Resolution of Both Houses No. 7 ukon ang Economic Charter Change sa Senado, antes magdesisyon kun ang petisyon sa pagpamatok ang ipasaka na sa Korte Suprema.
Kahapon, napasar na sa 3rd and final reading sa House of Representative ang hagna sa boto nga 228-YES, 8-NO kag 2-Abstention.
Sa interview sang Bombo Radyo Bacolod kay Bayan Muna Chairperson Atty Neri Colmenares, nagapamatok ang Bayan Muna sa Charter Change bangod ini ang indi para sa interes sang mga pumuluyo kundi para sa interes sang pipila lamang nga sektor.
Panindugan sini nga ang pagbukas sang ekonomiya sa foreign ownership ang makalupog sa lokal nga negosyo sa pungsod.
Dugang pa sini nga tuman ka dako nga puder ang ginahatag sa Kongreso bangod sa pagpasar sang hagna, indi na magakinahanglan sang plebisito ukon three-fourth vote sa Kamara.
Ini ang nagapakita nga bisan ano nga oras, sarang lamang ligwaton sang Kongreso ang konstitusyon, kag ginalantaw na nila nga ang Economic Charter Change ang umpisa pa lamang kag madamo pa sang bag-uhon sa likod sini.
Para kay Colmenares, ini na ang pinakadelikado nga lihok sa tinutuyo nga pagligwat sa konstitusyon bangod ini ang naumpisahan sa constitutional convention sang nakaligad nga tuig, people’s initiative sang Enero kag karun ginaduso naman ang constitutional assembly.
Suno pa diri, wala man nagasulbar sa problema sa kapigaduhon ang economic charter change.
Paandam ni Colmenares nga makaptan na sa liog sang mga foreign investors ang Pilipinas hinali nga sila ang pahanugutan sa pagpanag-iya sa mga public utilities kaangay sa kuryente, tubig, transport kag education.
Pahanumdom sini nga madamo sang kwarta ang mga foreign investors kag indi makasarang nga magcompete ang mga Filipino businessman, gani kun madayun nsa ulihi nakita sini nga mangin squatter na lamang ang mga Pilipino sa atun kaugalingon nga pungsod.
Bangod napasar na sa Kamara, ginabantayan na lamang sang Bayan Muna ang mangin dalagan sang pagtalakay sang hagna sa Senado kag sa tion nga magpabor man ang mga Senador, sila ang magafile na sang petisyon sa Korte Suprema.
