Ginalantaw sang Bayan Muna nga nagaduha-duha pa ang prosecution team kun ipatawag si Col. Raymund Dante Lachica, ang Commanding Officer sang Vice Presidential Security and Protection Group (VP SPG) bilang hostile witness sa impeachment trial batok kay Vice President Sara Duterte.
Sa interview sang Bombo Radyo Bacolod kay Bayan Muna Executive Vice President Atty Carlos Isagani Zarate, apisar nga lunsay pangalan ni Lachica ang nagagwa nga responsable sa disbursement sang confidential and intelligence funds sang Office of the Vice President, ginatakos pa sang prosekusyon kun makabenepisyo ukon makaguba sa ila ang paggamit diri bilang hostile witness.
Paathag ni Zarate nga ang hostile witness amo ang kaalyado sang pihak nga partido apang may makuha nga crucial nga impormasyon nga makahatag kasanagan sa kaso.
Apang ara gihapon ang risgo nga ini ang magatindog gid para sa iya amo nga amo si VP Sara.
Mahimo man nga ipanindugan ni Lachica nga indi pwede nga madisclose ang identities bangod ini ang makabutang sa peligro sa kabuhi sang informant.
Dugang pa nga nagpagwa sang statement ang Office of the Vice President nga willing nga magtestigo si Lachica, nga mahimo ginalantaw sang prosekusyon nga pa-on ukon bitag.
Suno diri, mahimo ginalantaw naman sang prosekusyon nga sangsa magrisgo kay Lachica, nagakaigo na ang ila mga ebidensya gikan sa Land Bank of the Philippines kag Office of the Vice President, para pamatud-an nga ang P125 million ang na-encash kag ginhatag sa indi otorisado nga persona, nga indi man organic personnel sang OVP.
Sa pihak nga bahin, mahimo man nga gamiton sang depensa nga testigo si Lachica, apang bangod ini ang indi hostile witness, sila ang indi makagamit sang leading question ukon answerable by yes or no, sa direct examination, bangod magagwa nga kaangay nga ginatudluan sang ihambal ang witness.
Ini bangod ginapahanugutan lamang ang leading question sa direct examination kun ini ang hostile witness ukon gikan sa pihak nga kampo.
Samtang kun indi gamiton nga witness sang prosekusyon kag depensa si Lachica, ini ang sarang man isubpoena sang Senator-judges, ilabi na nga sila ang mas nagapangita sang sabat sang natungdan.
