Ginapakamaayo sang Executive Vice President sang Bayan Muna Partylist nga pinaagi sa ginpatigayon nga Senate Hearing madamo sang mga self incriminating statements si former President Rodrigo Duterte, apang dismayado man ini bangod kaangay nga ginhimo lamang nga platform para sa monologue sang anay Presidente.
Sa interview sang Bombo Radyo Bacolod kay Atty Carlos Isagani Zarate, ang mga self incriminating statements ni Duterte angot sa death squad ang nagabasura sa panindugan sang mga supporters sini nga indi matuod ang extrajudicial killings.
Gintindugan man sini nga siya ang nagmando sa mga kapulisan nga itrigger ang mga drug suspect nga magbato kag ini ang tiruhon.
Apang ginakwestyon ni Zarate ang pahayag sang anay Presidente nga gina-ako sini ang responsibilidad sa mga napatay sa war on drugs, bangod sang ginpamangkot ni Senator Risa Hontiveros tuhoy sa liability sa pagpatay sa 17 anyos nga si Kian delos Santos, ini ang madamo na sang ginhambal kag ginlecturan pa ang Senadora.
Ginakasubo sang abogado nga kaangay nga may gahom si Duterte sa Senado kag ini ang ginapabay-an lamang nga magpamuyayaw.
Para sa iya, ang indi pagsaway ni Senate Minority Leader Aquilino “Koko” Pimentel III, nga amo ang nagserbe nga preciding officer, kay Duterte nga dugay-dugay nagapamuyayaw kag wala naga-obserbar sang proper decorum ang nagpanubo sa dignidad sang Senado.
Dugang pa ni Zarate nga sanday Senator Ronald “Bato” dela Rosa kag Senator Bong Go, nga involved sa mga alegasyon ang dapat nag-inhibit kag nagtindog na lamang nga resource person, sa baylo sila ang aktibo nga nagpartisipar sa Senate hearing.
Bangod under-oath ang anay Presidente sang magpagwa sang statement, nagapati si Zarate nga ini ang magamit batok sa iya sa proper court.
Panawagan naman sini sa Senado kag House of Representative nga ipadala ang tanan nga mga natipon nga ebidensya, kalakip na ang testimony sang mga witnesses sa International Criminal Court.
