Ginkumpirmar sang chaiperson sang Bayan Muna nga may yara sang nagakatabo nga pagpaperma sa mga pumuluyo para sa isa ka petisyon agud i-amend ang isa ka constitutional provision nga nagadirekta sa chambers sang kongreso nga separado nga magboto kun nagamodify sang Konstitusyon.
Sa interview sang Bombo Radyo kay Atty Neri Colmenares, nagpatigayon sang survey ang Bayan Muna sa Metro Manila kag sa pila ka mga probinsya kun sa diin natukiban nga may yara sang nagapanagtag sang P100 tubtob sa P250 sa mga tawo para papirmahan ang petisyon para sa Charter Change kun sa diin ginahambal sa mga tawo amo nga ini ang ayuda gikan sa gobyerno.
Suno diri, sa kapin sa 65 million ka mga registered voters sa Pilipinas, nagakinahanglan diri sang 7.5 million ka pirma sang mga Pilipino para sa petisyon, amo sa karun dako ang pamangkot sini kun sin-o ang yara sa likod sang pagbakal sang boto sang mga pumuluyo na kun isipon sa 7.5 million ka mga pilipino nga hatagan sang tag P100 ukon tag P250, tuman ka dako sang maigoan sini nga kwarta.
Sa bahin sang Bayan Muna, suno kay Colmenares, wala sang kamatuoran sa promisa nga sa idalum sang Charter Change, makabangon ang pungsod sa kapigaduhon kag madula ang korapsyon apang suno sa abogado posible nga maglala pa gid ini.
Pahayag ni Colmenares, ila ginapa-intindi sa tagsa kun ano ang mangin resulta kun matigayon ang Charter Change, nagpanawagan man ini sang imbestigasyon kun diin naghalin ang pondo nga gingamit para mabakal ang boto sang pumuluyo.
Samtang, kun matigayon naman ang Charter Change, suno kay Colmenares, sila magafile sang kaso sa Korte Suprema.
