Ginpanindugan sang Executive Vice President sang Bayan Muna nga kun seryoso ang Senado kag House of Representatives sa paglagas sang mga involved sa maanomalya nga flood control projects, sila ang dapat magpasar sang layi nga magatukod sang independent commission.
Sa interview sang Bombo Radyo Bacolod kay Atty Carlos Isagani Zarate, ang itukod nga independent commission, amo ang magapatigayon sang imbestigasyon.
Samtang ang mga ibutang nga miyembro ang dapat indi ma-impluwensyahan sang sin-o man sa executive kag legislative department.
Panawagan ni Zarate nga indi lamang dapat itutok sa mga contractors ang kaakig, kundi subong man sa mga Senador, Kongresista kag iban pa nga opisyales sang gobyerno partikular na ang mga Department of Public Works and Highways (DPWH) officials.
Suno diri, indi dapat untatan ang paglagas sa mga ini tubtob nga mabuyagyag ang mga kurapsyon.
Panindugan sini nga indi mapasar ang budget kag mahatag sa mga contractor nga wala nagalabay sa ehikutibo kag lehislatibo.
Nagapati si Zarate nga sa ulihi, maigo man diri si President Ferdinand “Bongbong” Marcos Jr.
Suno diri, ang independent commission ang dapat magtumod sa rasun sang kurapsyon sa Pilipinas.
Indi nagakaigo para sa abogado nga Senado ukon Kamara ang maga-imbestigar bangod madamo sa ila ang imbulbado man ukon ang ila nga pamilya.
Panawagan man sini nga pasanyugon ang paghatag sang proteksyon sa mga magatindog nga whistle blower.
Nagapati si Zarate nga madamo sang indi magwitness bangod mahuyang ang witness protection program sang gobyerno.
