Nagalaom ang vice chairperson sang House committee on appropriations nga maaprubahan ang Bayanihan to Arise as One Act ukon Bayanihan 3 sa third and final reading sa Lunes.
Nahibaluan nga kahapon, gin-aprubahan na sang House of Representatives sa second reading ang Bayanihan 3.
Sa interview sang Bombo Radyo Bacolod kay Bacolod City Lone District Congressman Greg Gasataya, ginpahayag sini nga ginabanta sa Lunes patigayunon ang deliberasyon para sa third and final reading sang Bayanihan 3.
P401 billion ang pondo nga gin-aprubahan para sa hagna, sa baylo nga P405 billion nga nauna nga ginpropose sang Kongreso, bangud amo ini ang gincertify sang Bureau of Treasury nga available funds.
Paathag ni Gasataya nga dapat nga maligadan sang tatlo ka session days antes patigayunon ang masunod nga deliberasyon para sa Bayanihan 3, magluwas nalang kun gincertify as urgent sang opisina sang presidente.
Ginkompirmar sang Bacolod City Lone District Congressman nga P2000 per Filipino ang gin-aprubahan sang Kongreso nga ayuda.
Nalakip man sa Bayanihan 3 ang pension and gratituity fund sang militar.
Ginpahayag man ni Gasataya nga mas mahapos ipatuman ang Bayanihan 3 komparar sa Bayanihan 2 nga may masobra sa 200,000 pa ka mga beneficiaries sa bilog nga pungsod nga wala pa mareleasan tubtob karun.
Samtang, magabulig man ang kongresista sa pagfollow up sa PhilHealth angot sa wala nabayaran nga mga hospital claims.
Suno Gasataya, wala man nagrequest sang supplemental budget ang ahensya.
Nagacoordinate man ini sa mga hospital agud mahibaluan man kun ginabayaran ini sang Philhealth.
Mahimo man ang Kongreso nga makapatigayon sang hearing agud talakayon ang issue sang mga hospital nga wala nabayaran sang PhilHealth.
