Natalana nga pasakaan sang kaso subong nga adlaw ang bayaw sang alkalde sang Hinigaran nga nadakpan sa buybust operation sa banwa sang Binalbagan kahapon.
Ala-1:30 kahapon sang naaresto sang Binalbagan Municipal Police Station ang subject nga si Hermilo Sevilla nga bayaw ni Mayor Josie Nadie Arceo sang Hinigaran.
Naaresto si Sevilla sa piggery nga ginatrabahuan sini kag ginapanag-iyahan man ni Mayor Arceo sa Brgy. Enclaro.
Nakuha sa paghinakop ni Sevilla ang 2 grams sang suspected shabu nga ginabanta nagabalor sang P16, 000.
Sa interview sa hepe sang Binalbagan Municipal Police Station nga si Police Major James Latayon, mga isa naman ka bulan nga nakalab-ot sa ila ang impormasyon tuhoy sa modus ni Sevilla apang mismo si Mayor Arceo ang nagpa-verify man sang impormasyon nagligad nga semana.
Subong nga adlaw natalana nga pasakaan sang kaso nga paglapas sa RA 9165 ukon Comprehensive Dangerous Drugs Act of 2002 ang suspetsado.
Si Sevilla ang utod sang asawa ni Mayor Arceo.
