Indi magsanto ang pahayag ni presidential aspirant Ferdinand “Bongbong” Marcos Jr. kag running mate sini nga si Mayor Sara Duterte-Carpio tuhoy sa pagkalakip sang aktor nga si Robin Padilla sa senatorial slate sang UniTeam.
Sang Miyerkules, gin-anunsyar ni Duterte-Carpio sa isa ka campaign rally sa Paoay, Ilocos Norte nga si Padilla ang ika-12 nga senatorial candidate sang UniTeam.
Kahapon, nagpagwa naman sang statement ang kampo ni Marcos nga indi pa opisyal nga kabahin sang slate sang UniTeam si Padilla kag may yara lamang ini sang 11 ka mga senatorial candidates.
Suno kay Atty. Vic Rodriguez, tagpamaba ni Marcos, sa lain nga partido kabahin ang aktor kag santo sa pahayag ni Marcos, makaupod lamang ini sa ila event bilang guest kag abyan sang UniTeam.
Kahapon, liwat naman nga nagpagwa sang statement si Duterte-Carpio kag nagpanindugan nga kabahin si Padilla sa 12 ka mga senatorial bet sang UniTeam sa May 2022 elections.
Si Padilla ang nagtake-oath bilang miyembro sang PDP-Laban sang Oktubre 2021.
