Aminado ang tagpamaba sang Bacolod City Police Office (BCPO) nga nagnubo ang numero sang mga nagaproseso nga mangin dealer, manufacturer kag retailer sang palupok sini nga tuig.
Sa interview sang Bombo Radyo kay Police Lt. Col. Ariel Pico, ginpahayag sini nga nakibot siya sang nahibaluan nga apat na lang ka mga manufacturer ang nagaproseso sa karun sang ila nga mga lisensya apang madamo gihapon ang mga retailer.
Suno kay Pico, ini bangud madutay nalang ang mga nagaubra sang palupok indi kaangay sang una nga in demand ini.
Isa man ka rason suno diri amu ang manubo nga income sa palupok sang nagligad nga tuig kag ang pronouncement ni Presidente Rodrigo Duterte sadto nga may total ban sa tanan nga sahi sang firecracker.
Apang sa karun, wala pa man sila sang may nabaton nga mando.
Suno sa iya, isa ini sa mga livelihood nga madula sa ciudad bangud kun gamay ang manufacturer, gamay man ang baligya.
Suno diri, antes magkadto sa Police Region Office 6 ang mga nagaproseso, kinahanglan nila anay magkuha sang endoresement sa BCPO kun sa diin ginatsekyar kun kumpleto ang requirements.
Suno sa tagpamaba, ginadumilian gihapon ang mga palupok kaangay sang watusi, super bawang, picolo, five star, Goodbye Philippines kag Ben Ladin.
Ginapahanugutan naman ang mga pasirit.
Nagpahanumdum man ini nga sa likod sang Pope John Paul Tower lang sarang makabaligya kag indi pwede sa mga tiyangee bangud kun madakpan, may nakaigo ini nga multa.
