Nakabaton sang Medalya ng Pagkilala ang director sang Bacolod City Police Office (BCPO) kag Negros Occidental Police Provincial Office (NOCPPO) sa Flag Raising and Awarding Ceremonies nga ginpatigayon sa Camp Gen Martin Teofilo B Delgado, Iloilo City kahapon.
Ang nasambit nga seremonya ang ginpangunahan ni Police Regional Office (PRO6) Director Police Brigadier General Flynn Dongbo kun sa diin nalakip sanday BCPO Director Police Col. Thomas Joseph Martir kag NOCPPO Director Police Col. Leo Pamittan sa siyam ka mga directors nga nakabaton sang awards bangud sa pagpakita sang exemplary nga performance bilang unit commanders nga nagresulta sa pagpanguna sang regional director sang PRO6 sa overall PNP rating sa Individual Commanders Performance Evaluation Rating para sa bulan sang Abril.
Nangin Guest of Honor kag Speaker sa seremonya si Iloilo Governor Arthur R. Defensor, Jr. kun sa diin iya ginpatpat ang importansya sang pagbuligay sang PNP kag local government unit sa pag-angkon sang progresibo nga probinsya kag pagpabilin sang kalinong kag kaluwasan sa bilog nga rehiyon.
