BACOLOD CITY — Ginpanginwala lamang kag ginkadlawan sang director sang Bacolod City Police Office (BCPO) ang alegasyon nga nagabaton ini sang payola gikan sa iligal nga operasyon sang jai alai.
Una diri, nagpalab-ot sang mensahe sa Facebook page sang Bombo Radyo Bacolod ang sa likod sang account nga Kotong Cops nga nagabaton si Senior Supt. Francisco Ebreo sang 200 mil pesos nga payola kada bulan.
Magluwas kay Ebreo, gin-akusaran man ang pila pa ka mga opisyal sang kapulisan sa ciudad.
May angot sini, ginhangkat ni Ebreo ang naga-akusar nga magpakita sang ebidensya.
Samtang bilang sabat sa alegasyon, suno sa BCPO Director padayon ang ila nag kampanya kontra sa tanan nga sahi sang iligal nga panahor kun sa diin humalin sang Noviembre 2017 tubtob kahapon nga adlaw, may yara na sang walo ka naaresto kag napasakaan sang kaso may angut sa jai alai.
May yara naman sang 66 ka mga nadakpan nga imbulbado sa iban pa nga sahi sang iligal nga pasugal.
Suno kay Ebreo humalin sang nagpungko ini nga BCPO director nangin mandato na sini sa tanan nga police stations nga kampanyahan ang tanan nga sahi sang iligal nga panahor.
Nagapati naman ang director sang BCPO nga ang mga tawo nga imbulbado sa iligal nga druga ang sa likod sang pag-akusar man sang duha ka opisyal sang kapulisan sa ciudad nga nga protektor man sang iligal nga pasugal kag payola gikan sa mga nagabaligya sang peke nga DVD’s.
Sa alegasyon sang tawo sa likod sang account nga Kotong Cops gindalahig man sanday Supt. Nasruddin Tayuan, ang head sang BCPO Intelligence Group kag Supt. Ritchie Yatar, head sang Mobile Group.
Suno kay Ebreo, ang duha ka mga opisyal ang may dako gid nga bulig sa BCPO indi lamang sa kampanya kontra iligal nga pasugal kundi sa iban pa nga illegal activities.
Nagapati si Ebreo nga mga imbulbado sa iligal nga druga ang sa likod sang mga alegasyon agud nga mapahalin ang duha ka opisyal sa BCPO.
Suno sa BCPO director, maayo nga mga pulis sanday Tayuan kag Yatar gani nga luyag sang mga iligalista nga mapahalin ang mga ini sa BPCO agud nga makapadayon sila sa ila iligal nga operasyon.
