Ginapanugyan sang City Director sang Bacolod City Police Office sa mga police personnel nga batunon na lamang sa mga pagbag-o sa Philippine National Police (PNP) organization sangsa ini ang pamatukan.
Sa pahayag ni BCPO Director Police Col Joeresty Coronica, aminado ini nga may ara sang mga kapulisan nga nagbatyag sa mga panibag-o nga mandato ni PNP Chief Police Brig Gen Nicolas Torre III.
Kalakip diri ang mando nga kinahanglan mapanubo sang mga kapulisan ang ila nga bug-at kasubong man ang 3-minute response time.
Suno kay Coronica, kun wala sang health issue nga rasun sa pagtambok, mahapos lamang nga masolusyonan ang problema bangod ini ang nakadepende na lamang sa disiplina sa pagkaon kag exercise.
Pahanumdom sini nga kun indi na halos madala ang lawas sang isa ka pulis, mangin mahina man ang pagresponder sini sa mga insidente.
Aminado man ini nga wala nahatagan sang pagtamod ang physical activities sang kapulisan sa nakaligad nga pagpamuno, kag wala na sang tion para diri kun basihan ang ila schedule.
Gani nagalaom ini nga sa bag-o nga pronouncement, may italana nga adlaw kag oras para sa physical activities sang mga kapulisan.
Panugyan sini nga suportahan ang mga programa, aktibidad kag proyekto sang chief PNP bangod ini ang para man sa kaayuhan sang organisasyon.
Suno kay Coronica, dapat nga batunon ang pagbag-o bangod kun ini ang pamatukan, makahatag lamang sang stress.
