Ginpanindugan sang Bacolod City Police Office (BCPO) Director nga ang pahayag ni former Iloilo City Police Office Director Police Lt Col. Jovie Espenido sa Congressional Hearing sang Quad Committee nga ang Bacolod City ang source sang illegal drugs sang Iloilo ang nakabasi sa daan pa nga data.
Madumduman nga si Espenido ang nagserbi man nga pinuno sang Bacolod City Drug Enforcement Unit (CDEU) sang 2019 tubtob 2020.
Sa interview sang Bombo Radyo Bacolod kay BCPO Director Police Col. Joeresty Coronica, mahimo nga sang nagpungko nga City Director sa ICPO si Espenido, pila sa mga nakumpiskar nila nga illegal nga droga ang naglabay sa Bacolod City.
Apang paathag sini nga sa ila impormasyon, kalabana sang illegal nga droga nga nagasulod sa ciudad sang Bacolod ang gikan sa Luzon.
Dugang pa sini nga kun matuod nga ang Bacolod City ang source, dapat nga madugay na nga may natumod nga shabu laboratory.
Paathag sini nga wala man sang pamatuod nga gikan gid sa ciudad sang supply.
Panindugan sini nga nagapadayun ang kampanya sang BCPO batok sa illegal nga droga.
Aminado ini nga apisar sa ginapatigayon nga supply reduction efforts, may nagasulod gid gihapon nga supply bangod mataas ang demand.
Gin-athag man sini nga wala man sang polisa ang Philippine National Police nga may reward kun may mapatay nga drug personalities.
Apang ginapanindugan ni Coronica nga ang rewards sa mga accomplishment ang nagaserbe nga motibasyon sang kapulisan agud mas mangin mapisan sa pagserbisyo.
