Ginpahayag sang City Director sang Bacolod City Police Office nga tindugan nila ang ila ginhimo bangud nakahibalo sila nga wala sila sang ginhimo nga malain.
Ini ang nangin sabat ni Police Col. Joeresty Coronica matapos nga ginpadal-an ang mga ini sang Office of the Ombudsman sang subpoena kasunod sang ginpasaka nga kaso sang transport leaders batok sa iya kag kanday Police Lt. Col. Joery Puerto kag Police Major Eugene Tolentino kasunod sang pag-aresto sa mga transport leaders matapos ang kinagamo sa ginpatigayon nga rally-protesta sa gwa sang L’Fisher hotel sang Setyembre 2024.
Sa interview sang Bombo Radyo Bacolod kay Police Col. Joeresty Coronica, wala naman sila nakibot bangud sang nagapatunda pa lang ang mga ini nga magpasaka sang kaso batok sa ila sila na ang naghangkat nga pasakaan sila sang kaso kun may nakita ang mga katapo sang transport group nga may sala ang mga ini.
Suno kay Coronica, ang importante diri nga ang kaso nga ginpasaka sang mga kapulisan batok sa mga ini nga paglapas sa Batas Pambansa Bilang 880 ukon ang Public Assembly Act of 1985; direct assault kag disobedience to agent of person in authority ang nagsaka na indi lang sa prosecutor kun sa korte.
Ginpasakaan sang mga kapulisan sang kaso ang tatlo ka leader sang nasambit nga grupo kun sa diin ginkasuhan sa paglapas sang Batas Pambansa Bilang 880 ukon ang Public Assembly Act of 1985 kag disobedience to agent of person in authority kag isa ka nagpanghaboy sang bato ang ginkasuhan sang direct assault.
Suno diri, wala na siya namag-o sa kaso ukon counter charges nga ginpasaka sa iya sang transport group bangud madamo na ini sang naeksperyensyahan nga kaangay sini kag part and parcel lamang ini sang ila trabaho bilang nagapatuman sang layi.
Suno sa City Director sa pagkamatuod ang duha sini ka promotion nadelay bangud man sa ginpasaka sa iya nga counter charges apang ini ang nadayon man bangud napamatud-an sini nga wala siya sang sala.
Nabaton na nila ang subpoena kag nakapadala na sila sang ila nga counter affidavit sang March 14.
Nagpasalig man ini sa duha ka police officials nga indi na magkabalaka sa gastos sa abugado bangud siya na ang bahala kag nagbulig man ang ila nga legal service.
Wala man sang epekto ang kaso nga ginpasaka batok sa ila.
