Nagtanyag sang P10,000 nga reward si acting Bacolod City Police Office (BCPO) Director Police Col. Noel Aliño sa makahatag sang impormasyon ukon makatudlo sa mga nagapamakal kag naga-ihaw sang karne sang ido.
Nahibaluan nga namonitor sang Animal advocates sa Negros Occidental nga may-ara sang nagapamakal kag naga-ihaw sang ido sa banwa sang Pulupandan.
Sa impormasyon, nagapamalay-malay ang mga ini sakay sa tricycle kag nagapamakal sang ido sa balor nga P50 tubtob P100.
Nahibalaun nga sa idalum sang Animal Welfare Act of 1998, ginakabig nga iligal ang pagbakal sang ido agud nga ihawon.
Ang madakpan sa kaangay nga buluhaton ang mahimo mapasakaan sang kaso kag mapriso sang anom ka bulan tubtob sa anom ka tuig kag multa nga P5,000 tubtob P50,000.
Sa interview sang Bombo Radyo Bacolod kay Aliño, ang P10,000 ang gikan mismo sa iya nga bulsa kag igahatag sa mga makahatag sang impormasyon nga makabulig sa pagdakop sa suspetsado.
Padayun man ang monitoring sang BCPO, agud matumod kun may-ara sang nagapamakal sang ido ukon nagabaligya agud nga ihawon sa syudad sang Bacolod.
