Gin-athag sang Bacolod City Police Office nga itlog nga naputos sa papel kag indi granada ang dala sang lalaki nga namahog sa opisina sang BCPO kaina sang aga.
Sa interview sang Bombo Radyo kay BCPO Spokesperson Police Lieutenant Colonel Ariel Pico, ginpahayag sini nga ang anay live in partner sang isa ka job order casual nga empleyado ang nagkadto sa Records Section sang BCPO bangud luyag sini nga magbalikanay sila.
Apang indi magpasugot ang babayi gani ginpilit sini nga kuhaon ang cellphone sang babayi kag namahog nga may yara siya sang dala nga granada.
Bangud sa kakulba, ginhatag sang biktima ang iya nga cellphone kag gilayon naman nga nagdalagan ang suspetsado.
Gilayon nga nagconduct sang hot pursuit operations ang kapulisan kag paglab-ot sa balay sang suspetsado, nahibaluan nga itlog nga ginputos sa papel lang ang ila gina-alegar nga granada.
Ginkompirmar man sang pinuno sang BCPO Women’s and Children Protection Desk nga ginaplastar na ang kaso nga ipasaka sa suspetsado.
Suno kay Police Lieutenant Arlene Torrendon, apisar nga indi matuod-tuod nga granada ang iya nga dala, pamahog gihapon ang gin-ubra sang suspetsado.
Suno kay Torrendon, pasakaan man ini sang kaso nga robbery bangud sa pagkuha sang cellphone sang iya anay live-in partner.
