BACOLOD CITY — Wala ginadula sang Bacolod City Police Office (BCPO) ang posibilidad nga yari lamang sa ciudad sang Bacolod kag probinsiya sang Negros Occidental ang mga high value targets may kaangtanan sa ilegal nga druga.
Sa interview sang Bombo Radyo, ginpahayag ni BCPO Director Police Senior Supt. Jack Wanky nga hugot nila nga gina-monitor ang mga personalidad nga imbolbado sa pagbaligya sang ilegal nga druga kag sa karon, indi nila mabatyagan ang presensiya sang mga ini sa Bacolod.
Apang suno kay Wanky, mahimo nga nagabalik-balik man ang mga ini apang nagapanago lamang bangud nakahibalo nga mainit sila sa karon sa mata sang kasuguan.
Nahibaluan nga pila lamang sa mga drug groups nga naga-operate sa Bacolod kag Negros Occidental ang ginalakipan sang Cuadra Group, Berya Group kag Camaria Group.
Samtang, ginpabutyag sang BCPO director nga ila ginhingadlan ang mga high value targets agud mabuligan sila sang publiko sa pagdakop sa mga ini.
Suno kay Senior Supt. Wanky, pamaagi ini sang kapulisan agud makuha ang kooperasyon sang mga tawo nga nakakilala ukon may koneksyon sa mga nahingadlan.
Ginpabutyag sini dugang nga isa man ini ka paalinton sa publiko nga indi bulag ang kapulisan sa mga personalidad nga may kahilabtanan sa ilegal nga druga.