Ginarespeto sang Bacolod City Police Office ang desisyon ni President Rodrigo Duterte nga pahalinon si Vice President Leni Robredo bilang co-chair sang Inter-agency Committee Against Illegal Drugs (ICAD).
Sa interview sang Bombo Radyo kay BCPO Spokesperson Police Lieutenant Colonel Ariel Pico, si Duterte ang may kinamatarong nga magpahalin kay Robredo bangud siya man ang nag-appoint sini.
Suno kay Pico, nagapati sila sa wisdom sang Chief Executive kag nagapabilin siya nga neutral kag magasunod lamang sa mando.
Subong nga wala na si Robredo sa ICAD, ginapasalig sang PNP suno sa BCPO Spokesperson nga indi sila magpahuway sa operasyon batok sa illegal nga droga.
Aminado si Pico nga indi mahapos ang programa agud mapapas ang illegal nga droga kag sa baylo kuntani nga unahon sang bise-presidente ang trabaho, gin-ulamid sini ang opposing parties sa luwas sang pungsod nga indi man makabulig.
Nagapati ang police official nga lain ang set-up sang Pilipinas sa pagbato sa illegal nga droga kun ipaanggid sa iban nga pungsod.
Ginpasalig naman ni Pico nga ginahimo sang BCPO ang tanan nga masarangan agud matapna ang problema batok sa illegal nga droga.
