Ginkompirmar sang pinuno sang Bacolod City Police Office (BCPO) nga may yara sang benepisyo nga makuha ang pamilya sang pulis kun ini ang magtaliwan bangud sa paghimo sang katungdanan sini kadungan sang enhanced community quarantine kaangot sa coronavirus disease.
Madumduman nga may yara sang nagtaliwan nga miyembro sang police nga nakabase sa Laguna kag Metro Manila bangud sa coronavirus disease 2019 (COVID-19).
Sa interview sang Bombo Radyo Bacolod kay Police Col. Henry Biñas, hugot sini nga ginapanugyanan ang mga personnel ilabi na ang nagabantay sa mga border nga magsuksok sang nagakaigo nga Personal Protective Equipment (PPE) kag indi mag-uyat sa mga dokyumento kaangay sang ID nga ginatsekyar sang mga ini agud malikawan nga mainfect sang coronavirus disease 2019 (COVID-19).
Ginpahayag man sini nga ginatsekyar man ang mga personnel sang Philippine National Police (PNP) physician nga nakabase sa karun sa Negros Occidental Provincial Police Office (NOPPO) agud masiguro nga yara sa maayo ang ikaayong lawas sang mga ini.
