Ginkumpirmar ni Bacolod City Vice Mayor El Cid Familiaran nga liwat nga ginpahanumdom ni Presidente Rodrigo Duterte nga pasanyugon pa sang Bacolod City Police Office ang kampanya batok sa iligal nga druga.
Sa pagbisita ni Familiaran sa Malakanyang bilang tiglawas ni Mayor Evelio Leonardia sa pagsinapol sa presidente, ginpanugyanan sang presidente ang director sang BCPO paagi sa bise alkalde nga doblehon pa gid ang pagtinguha nga matapna ang problema sa iligal nga druga sa ciudad.
Sa atubang sang iban nga opisyales, liwat naman nga ginhinambit sang presidente nga isa ang Bacolod sa mga ciudad sa pungsod nga madata gihapon ang illegal drugs.
Samtang sa personal nga panan-awan ni Famiiaran, nagapati ini nga ginakonsiderar sang chief executive nga madamo gihapon ang illegal drugs sa ciudad bangud sa nagalab-ot sa iya ang mga report tuhoy sa accomplishment sang BCPO.
Santo sa datos sang Police Regional Office 6, nagapanguna ang BCPO sa may pinakamadamo nga buybust operation kag pinakamadamo man nga recovery sang shabu.
Aminado man ang bise alkalde nga silent worker si BCPO director Police Col. Henry Binas kag kuntento ini sa liderato sang city director.
Ginbaton naman sang pinuno sang Bacolod City Police Office bilang pagpanghangkat nga indi pagtalikdan ang liwat nga pahanumdom ni Presidente Rodrigo Duterte nga pasanyugon pa gid ang kampanya batok sa iligal nga druga.
Sa interview sang Bombo Radyo kay Police Col. Henry Binas, ginalantaw sang presidente nga madata gihapon ang illegal drugs sa Bacolod bangud sa nabaton niya nga report nga dako ang recovery sa tion nga magpatigayon sang buybust operation.
Apang indi mahimutig suno kay Binas nga nagatinguha ang napulo ka police stations sa Bacolod.
Sa pihak sini suno sa city director, may nagasulod gihapon nga illegal drugs sa ciudad kag magalala ini kun indi maghulag ang mga pulis.
Suno kay Binas, wala nila ginapabay-an ang anti-drug war bisan masako ang mga ini sa iban nga aktibidad kaangay sang MassKara Festival.
Panindugan sang city director, indi nila pagtalikdan ang pagpanghangkat sang presidente.
Apang kadungan sini, naghingyo si Binas sang bulig sang publiko bangud indi nila ini masarangan kun wala sang bulig sang mga pumuluyo.
