Ginpangabay ni P/Lt. Col. Ariel Pico, tagpamaba sang Bacolod City Police Office, nga magbulig man ang mga opisyales sa mga kabarangayan sa pagsaway sang mga pumuluyo nga nagalagaw ilabi na sa mga suludlon nga bahin sang mga barangay.
Suno kay Pico, indi masarangan sang kapulisan nga bantayan ang tanan nga lugar sa siyudad ilabi na ang mga malayo sa main roads.
Ginahingyo man sini sa mga tambay nga magkooperar man sa gobyerno kag indi magladay sa gwa sang balay.
Nahibaluan nga naglab-ot na masobra isa ka bulan ang ECQ sa siyudad sang Bacolod, kag ginapangabay sini nga kuntani madowngrade na ini sa GCQ.
Ginapangabay ni Pico nga tuod-tuorun nalang sang mga pumuluyo ang pagsunod agud indi mauyang ang nasuguran na nga pagsakripisyo.
Ginasiguro man ni Pico nga istrikto gihapon sang mga ini nga ginatsekyar ang mga home quarantine pass kun nagasunod ukon nagasupak sa odd-even number coding scheme.
Dugang pa sini, kun may presuhan lang, dugay na gindakop ang mga pasaway apang dako naman ini nga risgo sa mga priso bangod indi mahibaluan kun sila ang carrier.
Suno diri, ara ang yabi sa mga inner barangay agud nga matuman ang nagakaigo nga ECQ kag yara man sa mga ginikanan nga dapat magsaway sa ila kabataan nga nagahampang sa dalan.
Ginapauna man sini nga sa pagpanaog sa GCQ, madula naman ang inner border control apang padayun nga ipatuman ang pagsuksok sang facemask kag ang social distancing.
