Ginpasiguro sang Bacolod City Police Office (BCPO) nga padayon ang hugot kag istrikto nila nga pagpatuman sang City Ordinance 832 ukon riding-in-tandem ordinance sa ciudad sang Bacolod.
Sa interview sang Bombo Radyo Bacolod kay BCPO spokesperson P/Lt. Ma. Liberty Indiape, ginpahayag sini nga padayon ang ila implementasyon sang amo nga ordinansa kun sa diin ginadumilian ang mga driver kag backrider nga mag-angkasanay sa motorsiklo halin alas-9:00 sa gab-i tubtob alas-5 sang aga.
Nahibaluan nga ang magabayolar ang may yara sang penalidad nga P300 ukon pagkapriso sa sulod sang tatlo ka adlaw para sa driver kag P200 naman ukon pagkapriso sang duha ka adlaw para sa backrider.
Suno kay indiape, may mga exemptions lang sila kun kaisa ilabi na sa mga emergency ukon mga empleyado nga pakadto palang sa duty ukon papauli na.
Ginpasiguro man sini nga adlaw-adlaw sila nga nagamonitor sa mga police stations.
Suno sa iya, nagabutang gid sila sang mga police personnel sa mga strategic areas ilabi na sa mga madamo nga naga-agi ukon madulom nga mga lugar agud mapabilin ang peace and order sa ciudad.
