Nakahanda na ang mga personnel sang Bacolod City Police Office (BCPO) sa bag-o nga mga patakaran nga igapatuman sa mga LGUs angot sa general community quarantine sa siyudad.
Suno kay BCPO Spokesperson, P/Lt. Col. Ariel Pico, nagahulat nalang ang mga ini sang direktiba gikan sa national inter-agency task force (IATF).
Dako naman ang tsansa nga pagabuhinan ang mga inner border control sa siyudad samtang magapabilin naman ang pito ka outer border control tubtob matapos ang pagpatuman sang community quarantine.
Samtang, kun pagabasehan naman ang Article 151 sang Revised Penal Code, posible nga makasuhan kag dakpon ang mga nagabayular sa pagpatuman sang physical distancing kag indi pagsuksok sang facemask.
Apang ginakahangaw-an naman sang mga kapulisan ang posibilidad nga may madakpan nga carrier sang COVID-19 kag makalaton sa yara sa presuhan.
Ginasaway nalang ang mga ini kag gina-warningan, kag kun indi magpati amo palang nga ginadakop sang mga kapulisan.
Ginapangabay man sini nga kuntani may yara sang mass testing kun pagadulaon gid man ang quarantine, ilabi na sa bahin sang mga frontliners.
