Nagpanindugan ang spokesperson sang Bacolod City Police Office (BCPO) nga fake news kag wala sang kamatuoran ang nagalapta nga mensahe nga nagikan sa mga nagapaandam sa publiko nga may yara sang grupo nagikan sa Metro Manila nga nagapangkuha sang mga bata.
Sa interview sang Bombo Radyo Bacolod kay Police Lt. Col. Sherlock Gabana, wala sang kamatuoran ang nagalapta nga mensahe bangud kun may yara sang official statement nagikan sa mga kapulisan makita ini sa official social media account sang Bacolod City Police Office ukon naanunsyar na ini sa media entities kaangay sang Bombo Radyo Bacolod.
Suno kay Gabana, bangud wala sila sang ginpagwa indi ini matuod kag may yara lamang sang mga tawo ukon nga grupo nga luyag bulabugon ang kalinong kag katawhay sa syudad sang Bacolod.
Nagpanindugan man ang tagpamaba sang BCPO nga wala sang may natabo nga kidnapping sa syudad sang Bacolod kag ginasakyan lamang sang nagpalapta sang mensahe ang kaso sang 18 anyos nga babayi nga gin-post sang ginikanan sa social media nga ini ang nadula kag sang nasapwan patay sa sa 3rd Floor sang Cineplex Building, Araneta Street, Bacolod City.
Suno diri, ang 18 anyos nga biktima ang naghikog kag wala ginkidnap.
Suno kay Gabana, ang kaangay nga insidente nga may nagadula, mahimo nga nagaupod ang mga ini sa ila nga nobyo ukon naghikog kun sa diin ginasakyan lamang sang mga grupo nga luyag nga bulabugon ang syudad sang Bacolod.
Nagapanawagan man si Gabana sa mga pumuluyo nga kun may yara sang mga insidente nga matabo gilayon nga magpahibalo sa mgaotoridad agud nga matagaan nga nagakaigo.
Kasubong man nagapanawagan man ini sa mga personalidad nga nagapalapta sang wala kamatuoran nga estorya nga makaguba sang kalinong sang syudad.
Suno diri wala man sang namonitor santo sa intellegence report nga may yara sang kaangay nga grupo nga nagapangkuha sang bata ukon kidnapping kag kun may yara man nabalita na ini sang media entities.
Panugyan ni Gabana nga maayo nga nagahalong ukon nagaaligmat apang ang syudad sang Bacolod ang malinong kag matawhay.
Nagpaandam man ini nga kun sin-o man ang sa likod sini kag maimbestigaran kag mapatud-an nga sila ang may kahimuan mahimo sila mapasakaan sang kaso.
